Akurana Today All Tamil News in One Place
ஐக்கிய தேசியக் கட்சியின் செயற்குழுவில் நிலவும் 30 வெற்றிடங்களுக்கு தனக்கு சார்பானவர்களை நியமித்து ஜனாதிபதி வேட்பாளராக களமிறங்க பிரதமர் ரணில் விக்கிரமசிங்க திட்டமிட்டு வருவதாக தெரியவருகின்றது.
ஜனாதிபதித் தேர்தலுக்கான ஐக்கிய தேசியக் கட்சியின் ஜனாதிபதி வேட்பாளர் தொடர்பில் எதிர்வரும் புதன்கிழமையன்று கட்சியின் செயற்குழுவை கூட்டி இறுதி முடிவை அறிவிப்பதாக ஐக்கிய தேசிய முன்னணியின் பங்காளிக்கட்சிகளின் தலைவர்களிடம் பிரதமர் ரணில் விக்கிரமசிங்க உறுதியளித்துள்ள நிலையில் செயற்குழு உறுப்பினர்களின் புதிய நியமனம் சர்ச்சையை ஏற்படுத்தியுள்ளது. இது குறித்து மேலும் தெரிய வருவதாவது, புதிய செயற்குழு உறுப்பினர்களை நியமித்து அதில் ஜனாதிபதி வேட்பாளர் குறித்து வாக்கெடுப்பை நடத்தி இறுதி தீர்மானம் எடுக்க
திட்டமிடப்பட்டுள்ளது. ஐக்கிய தேசியக் கட்சியின் ஜனாதிபதி வேட்பாளர் பட்டியலில் பிரதமர் ரணில் விக்ரமசிங்கவும் இடம் பெற்றுள்ளமையினால் செயற்குழு கூட்டத்தின் போது பிரதமர் ரணில் விக்கிரமசிங்கவை ஜனாதிபதி வேட்பாளராக செயற்குழு நியமிப்பதற்கு அதிக வாய்ப்புகள் உள்ளதாக கட்சி வட்டாரங்கள் தெரிவிக்கின்றன.
மேலும் செயற்குழு ரணில் விக்கிரமசிங்கவை பிரேரிக்காத பட்சத்தில் அதன் தீர்ப்பு ரணில் விக்கிரமசிங்க பிரேரிக்கும் ஒருவருக்கே சாதகமாக அமையும் என தெரிவிக்கப்படுகின்றது.
இந்நிலையில் அமைச்சர் ரஞ்சித் அலுவிஹாரவுடனான சந்திப்பொன்றின் போது தான் நிச்சயமாக ஜனாதிபதி வேட்பாளராக களமிரங்குவதாக பிரதமர் ரணில் விக்கிரமசிங்க தெரிவித்திருந்தமை குறிப்பிடத்தக்கதாகும்.
ரணில் விக்கிரமசிங்கவின் செயற்பாட்டை கண்டித்துள்ள சஜித் தரப்பினர் எதிர்வரும் 25 ஆம் திகதி செயற்குழுவின் தீர்மானம் சஜித் பிரேமதாஸவுக்கு சாதகமாக அமையாவிடின் புதிய கூட்டணியில் தேர்தலில் களமிறங்க போவதாக எச்சரித்துள்ளதுடன் கொழும்பில் மாபெரும் எதிர்ப்பு போராட்டத்தையும் மேற்கொள்ளவுள்ளதாகவும் தெரிவித்துள்ளனர்.
இந்த சர்ச்சை தற்போது கட்சி மட்டத்திலும் அரசியல் மட்டத்திலும் பெரும் பரபரப்பை ஏற்படுத்தியுள்ளது. ஆரம்பம் முதல் ஐக்கிய தேசிய கட்சியின் ஜனாதிபதி வேட்பாளர் தொடர்பில் கட்சிக்குள் இழுபறி நிலை காணப்பட்ட நிலையில் தற்போது தேர்தல் நெருங்கி வருவதால் கட்சியின் வேட்பாளரை அறிவிக்க வேண்டிய கட்டாய கட்டத்தில் கட்சியின் தலைவர் ரணில் விக்கிரமசிங்க உள்ளார்.
ஐக்கிய தேசியக் கட்சியின் ஜனாதிபதி வேட்பாளர் தொடர்பில் மும்முனை போட்டி நிலவிய நிலையில் சபாநாயகர் கரு ஜயசூரிய தான் ஜனாதிபதி வேட்பாளர் அபேட்சகருக்கான போட்டியில் இருந்து விலகிக்கொள்வதாக தெரிவித்ததாக அமைச்சர் மலிக் சமரவிக்கிரம பிரதமருக்கும் ஐக்கிய தேசிய முன்னணியின் கட்சி தலைவர்களுக்கும் இடையிலான பேச்சுவார்த்தையின் போது தெரிவித்திருந்தார். இந்நிலையில் தற்போது ஐக்கிய தேசிய கட்சியின் ஜனாதிபதி வேட்பாளர் சஜித்தா? ருணிலா? என்பதே கேள்விக்குறியாக உள்ளது.
இந்நிலையில் ஐக்கிய தேசிய முன்னணியின் பங்காளி கட்சிகளான முஸ்லிம் காங்கிரஸ்,அகில இலங்கை மக்கள் காங்கிரஸ், தமிழ் முற்போக்கு கூட்டணி, ஜாதிக ஹெல உறுமய போன்ற முக்கிய கட்சிகளின் தலைவர்கள் சஜித் பிரேமதாஸவை ஜனாதிபதி வேட்பாளராக நியமிக்க வேண்டும் என தமது ஆதரவான நிலைப்பாட்டை தெரிவித்துள்ளனர். மேலும் ரணில் விக்கிரமசிங்க தொடர்ந்தும் பிரதமராக பதவி வகிக்க வேண்டும் என தெரிவித்துள்ளனர். இந்த நிலைப்பாட்டை தெரிவித்தமையினால் ரணில் விக்கிரமசிங்கவுக்கும் தமிழ் முற்போக்கு கூட்டணி;யின் தலைவர்களுக்கும் இடையில் கருத்து முரண்பாடும் ஏற்பட்டுள்ளது.
இக்காரணிகளை அடிப்படையாக வைத்து நோக்கும் போது ஐக்கிய தேசிய முன்னணியில் அங்கம் வகிக்கும் கட்சிகளின் நிலைப்பாடு சஜித்துக்கு ஆதரவாக இருப்பதையே புலப்படுத்துகின்றது. இவ்வாறான நிலையில் எதிர்வரும் 25 ஆம் திகதி ஐக்கிய தேசிய கட்சியின் செயற்குழு சஜித் பிரேமதாஸவை வேட்பாளராக அறிவிக்காவிடின் ரணில் விக்கிரமசிங்கவுக்கு பங்காளிகட்சிகளின் ஆதரவு கேள்விக்குறியாகிவிடும் அபாயம் உள்ளது.
மாறாக சஜித் தரப்பினர் குறிப்பிடுவதை போன்று அவர்கள் பிரிந்து சென்று தனித்து கூட்டணியமைத்து சஜித் பிரேமதாசவை போட்டியிட செய்தால் பங்காளிக்கட்சிகளின் ஆதரவு சஜித்துக்கு கிடைக்கும் என்பது தற்போது உறுதியாகியுள்ளது. இவ்வாறான நிலையில் ரணில் விட்டுக்கொடுக்காமல் களமறங்கினால் அவரால் தனித்து போட்டியிட்டு வெல்ல முடியுமா என்பது ஒரு புறமிருக்க சஜித்துடன் ஐக்கிய தேசியக் கட்சியை சேர்ந்த முக்கிய பல உறுப்பினர்கள் வெளியேறுவார்களாயின் கட்சியின் எதிர்காலம் கேள்விக்குறியாகிவிடும் என்று கூறப்படுகின்றது.
எனவே எதிர்வரும் 25 ஆம் திகதி செயற்குழுவின் தீர்மானம் ஜனாதிபதி தேர்தலிலும் ஐக்கிய தேசிய கட்சியின் இருப்பிலும் முக்கிய திருப்புமுனையாக இருக்கும் என எதிர்ப்பார்க்கப்படுகின்றது.
